Til umhugsunar fyrir fólk sem er að leggja sjálft. 
Þegar kemur að lögn á parketi þurfa vissir þættir að vera ofarlega í huga. 

Gegnheilt parket 

Ef leggja á gegnheilt parket á steinsteypta gólfplötu þarf að athuga rakastig steinsins, en allt undir 55% er talið vera í lagi ef líma á parketið niður beint á stein. Rakamælar eru yfirleitt lánaðir af söluaðilum parketsins og leggjum við ríka áherslu á við fólk að það nýti sér þá þjónustu. Í öllum þeim gólfum sem við komum nálægt lögn á er það grundvallar atriði að rakamæla gólfflötinn áður en lögn hefst. Það fer eftir aðstæðum hverju sinni hvernig síðan tekið er á málum reynist gólf vera með of hátt rakastig. En oftast er farin sú leið að loka yfirborði steinsins með ýmsum efnum og það efni sem hefur reynst okkur best er Eukula PU 550/551 polyurethan lakk, lakkaður tvær umferðir og stráð fínkorna sandi yfir seinni umferð. Ef parket er lagt á hljóðeinangrandi dúk er æskilegra að nota parket með nót og tappa frekar en þunnt tappalaust parket þar sem dúkurinn gæti gefið eftir ef um þennslu er um að ræða. Þær límtegundir sem æskilegast er að nota eru þær tegundir sem þenjast út og hafa mikið teygjuþol. Misjafn tími þarf að líða frá því að lögn er lokið og þar til yfirborðmehöndlun getur hafist, Biðtími frá því að parketið er lagt og þar til það er slípað og lakkað getur verið 2 dagar til 3 vikur.

Anhydrit gólf (gips flot) geta verið mjög varasöm varðandi niðurlímingu á parketi ef ekki er fylgt leiðbeiningum með undirbúning, yfirborðið þarf að slípa vel og síðan þarf að grunna gólfið til þess að styrkja það annars er hætt við að límið nái ekki neinni festu að ráði og parketið losni smátt og smátt með tímanum   

Tveggjaþátta lím þarf ekki nema 2 daga í þurrk áður en hægt er að slípa og yfirborðsmeðhöndla meðan hefðbundið spritt lím þarf 3.vikur. Eins er líka grundvallaratriði að nota tveggjaþátta lím undir planka sem eru breiðari en 100mm því viðurinn tekur alltaf einhvern raka í sig frá líminu.

Mjúkar eða gljúpar viðartegundir hleypa raka límsins fyrr í gegnum sig heldur en harðari og þéttari viðartegundir gera. Eins hefur tegund límsins áhrif á þurrktímann, hvort notað er einþátta eða tveggja þátta parketlím. 

Fura og Askur eru til dæmis mun gljúpari viðartegundir heldur en Eik, Jatoba, Hnota eða Yberaro. Ef notað er einþátta parketlím mælum við með að þéttustu tegundirnar standi fullar 3 vikur þar til þær eru yfirborðsmeðhöndlaðar. 
(sjá harka viðartegunda ) 

Samlímt parket 

Samlímt parket var oftast lagt í fljótandi lögn þ.e.límt saman í nót og tappa, og er parketið þá einn stór fleki á gólfinu en nú er smella eða viðarlæsing nær undantekningalaust aðeins í boði frá flestum framleiðendum en það er engu síður mjög áríðandi að hafa þensluraufar ca 8.m/m meðfram veggjum til þess að flekinn lyftist ekki upp þegar parketið þenst út, en parket er eins og annað lifandi efni að það samlagast umhverfinu þ.e þenst út á sumrin og dregst saman á veturna. 
Það þarf líka undirlag undir parketið og eru til þó nokkrar gerðir af því, það algengasta er 3mm gúmmí dúkur sem gefur 24db dempun niður á við en upp í rýmið sjálft er aðeins um 23% dempun um að ræða svo við mælum sérstaklega með undirlagsdúk sem ber heitið Floor Muffler 2mm þykkur en með ótrúlegri pressu í efninu gefur hann 33% dempun upp í rýmið sjálft sem er því besta sem gerist, hann er rakavarinn og myglu og sagga varinn og síðast en ekki síst á góðu verði, rakavörn er mjög mikilvæg á allar botnplötur. Einnig er hægt að klæða steingólfið með þolplasti, ef notaðir eru undirlagsdúkar sem ekki eru rakavarðir, sem er látið skarast vel í samskeytum og límt saman með límbandi. Það hefur farið vaxandi að fólk láti líma samlímda parketið beint á steininn og sjáum við því ekkert til fyrirstöðu ef eins er farið og með gegnheila parketið þ.e passa rakastigið á steininum og rétt lím sé notað. 


Plastparket 

Plast parket er til í þremur megin gerðum, það sem er gegnheilt plast með viðarlíkis yfirborði og síðan harðpressað MDF einnig með viðarlíkis yfirborði sem er mun viðkvæmara og mjög mikilvægt að líma vel í nótina á efninu þannig að límið gubbist upp úr samskeytunum til þess að loka þeim, en eins og með samlímda parketið er nær eingöngu plastparket í boði með læsingu og þá á ekki að líma það saman . Einnig er til harðpressað vatnsþolið HDF sem er mun dýrara en það venjulega og mælum við með því frekar ef einhver hætta er á vatnságangi svo sem í eldhúsi. Á síðustu árum hefur verið mikil þróun í plastparketi eða eins og margir vilja kalla HARÐPARKET sem er ekkert verra nafn en hvað annað. Það sem þarf að leggja mest upp úr er styrkleikinn AC flokkur eða notkunar flokkur en hér notum við AC stuðul þar sem AC 1 er lægst og AC 5 Hæsti gæðaflokkur.  Ekki er ráðlegt að nota efni sem er með lægri stuðul en AC3 ef vilji er til að efnið endist lengur en ár þar sem mæðir á. En hér er aftur áréttað að nota rétt undirlag og hafa í huga þar sem smella á plastparketi er oftast þunn og veikluleg, skiptir miklu máli að nota EKKI dúk undir sem gefur mikið eftir, þarafleiðandi má segja að Floor Muffler dúkurinn skipti sköpum hvað varðar endingu á læsingunni þar sem hann er aðeins 2mm og gefur mjög lítið eftir.

Sölu og innflutningsaðilar á Floor Muffler á Islandi eru Harðviðarval Krókhálsi og Egill Árnason Suðurlandsbraut.